Regrets - CL

Joachim du Bellay
CL

Seigneur, je ne sçaurois regarder d’un bon oeil
Ces vieux Singes de Court, qui ne sçavent rien faire
Sinon en leur marcher les Princes contrefaire,
Et se vestir, comme eulx, d’un pompeux appareil.

Si leur maistre se mocque, ilz feront le pareil,
S’il ment, ce ne sont eulx qui diront du contraire :
Plustost auront-ilz veu, à fin de luy complaire,
La Lune en plein midy, à minuict le Soleil.

Si quelqu’un devant eulx reçoit un bon visage,
Ilz le vont caresser, bien qu’ilz crèvent de rage :
S’il le reçoit mauvais, ilz le monstrent au doy.

Mais ce qui plus contre eulx quelquefois me despite,
C’est quand devant le Roy, d’un visage hypocrite,
Ilz se prennent à rire, et ne sçavent pourquoy.

Autres articles associés à ce dossier

À lire également du même auteur




Nos suggestions